ក្រិច៖ រដ្ឋាភិបាលក្រិចបានប្រកាសបិទតំបន់ទេសចរណ៍បុរាណ Acropolis និងប្រកាសបិទសាលារៀន និងទីតាំងគ្រូពេទ្យប្រចាំការនៅទូទាំងរដ្ឋធានី អាតែន (Athens) នៅថ្ងៃពុធ ទី១២ ខែមិថុនានេះ ខណៈដែលប្រទេសនេះប្រឈមមុខនឹងរលកកំដៅដំបូងនៃរដូវក្តៅដែលទើបនឹងឈានចូលមកដល់។ សីតុណ្ហភាពត្រូវបានគេរំពឹងថានឹងឡើងដល់ ៤៣អង្សាសេនៅថ្ងៃពុធ និងថ្ងៃព្រហស្បតិ៍នៅក្នុងផ្នែកខ្លះនៃប្រទេសក្នុងតំបន់មេឌីទែរ៉ាណេ ដែលជំរុញដោយខ្យល់បក់ពីភាគខាងត្បូងដែលនាំមកនូវខ្យល់ក្តៅ និងធូលីពីភាគខាងជើងនៃអាហ្វ្រិក។

ទីតាំងជួរភ្នំ Acropolis ដែលជាស្ថានីយ៍បុរាណដ៏ល្បីល្បាញបំផុតមួយរបស់ពិភពលោក ដែលរួមមានប្រាសាទ Parthenon ផងនោះ ត្រូវបានប្រកាសបិទចាប់ពីថ្ងៃត្រង់រហូតដល់ម៉ោង ៥ល្ងាច ខណៈបុគ្គលិកកាកបាទក្រហមបានដើរចែកទឹកបរិសុទ្ធដល់ភ្ញៀវទេសចរផងដែរ។ ជាងនេះទៅទៀត សាលាបឋមសិក្សា និងមត្តេយ្យសិក្សាជាច្រើននៅទូទាំងប្រទេសក៏បានប្រកាសបិទដំណើរការរយៈពេល ២ថ្ងៃផងដែរ។ 

គួរបញ្ជាក់ថា ក្រិក​ជា​ប្រទេស​មួយ​ក្នុង​ចំណោម​ប្រទេស​ដែល​ប៉ះពាល់ដោយ​អាកាសធាតុ​ខ្លាំង​បំផុត​នៅ​អឺរ៉ុប។ កាល​ពី​ឆ្នាំ​មុន សីតុណ្ហភាព​កើនឡើងខ្លាំង​បាន​ជំរុញ​ឱ្យ​មានហេតុការណ៍​ភ្លើង​ឆេះ​ព្រៃ​យ៉ាងធ្ងន់ធ្ងរ និងមាន​ភ្លៀង​ធ្លាក់​ខុស​ប្រក្រតី​បាន​បណ្តាល​ឱ្យ​មាន​ទឹកជំនន់​ដ៏​អាក្រក់​បំផុត​ក្នុង​កំណត់ត្រា ដែល​បាន​បំផ្លិចបំផ្លាញ​ដំណាំរបស់កសិករ និងប៉ះពាល់ដល់​ជីវភាព​រស់នៅរបស់់ប្រជាពលរដ្ឋផងដែរ។

ស្ថានភាពអាកាសធាតុស្រដៀងគ្នានេះ ក៏បានកើតមានផងដែរកាលពីឆ្នាំមុននៅស្ទើរតែទូទាំងទ្វីបអឺរ៉ុបភាគខាងត្បូង រួមទាំងព័រទុយហ្គាល់ បារាំង អេស្បាញ និងអ៊ីតាលី ខណៈអគ្គិភ័យដែលកើតឡើងពីភ្លើងឆេះព្រៃបានបណ្តាលឱ្យមនុស្សរាប់សិបនាក់ស្លាប់។ ជាក់ស្ដែងនៅក្នុងប្រទេសក្រិច ហេតុការណ៍អគ្គិភ័យបានចាប់ផ្តើមលឿនជាងការរំពឹងទុកក្នុងឆ្នាំនេះ ជាពិសេសអគ្គិភ័យមួយបានកើតឡើងកាលពីខែមីនាកន្លងទៅផងដែរ៕